2020-miit
2030-mut sumiiffinni innuttaasut amerlassusissaat
Sumiiffinni assigiinngitsuni innuttaasut amerlassusissaannik naatsorsuinermi misilittakkat aallaavigalugit naatsorsuutit inerneri, 1.januaari 2020-mi Kalaallit Nunaanni innuttaasut suiaassusaannik, ukiuinik, nunassittarnerillu suussusaannik aallaaveqartut ukiut qulit tulliuttut qanoq isikkoqarumaarsinnaanerinut naatsorsuutaapput.
Naatsorsuinerit
Kalaallit Nunaanni innuttaasut siunissami sumi najugaqarumaarnissaannik
takussutissiinngillat. Taamatullu suiaassutsit ukiullu agguataarnerisa
isikkoriumaagassaannik takussutissiinatik. Siunissap tamanna takutikkumaarpaa,
inuiaqatigiinni, meeqqiortarnermi toqusoqartarneranilu atukkat imaluunniit
politikkikkut tulleriaarineq tassani apeqqutaassapput.
Taamaattoq
siunissami inuttaasut annertussusissaannut ilusissaannullu naatsorsuutit
inuiaqatigiinnut tunngasunik pilersaarusiornermi qitiulluinnarput.
Naatsorsueqqissaartarfiullu siunissami ineriartornerup ilusissaanut
naatsorsuutinik, piviusorsiortumik tunngavilersukkanik tutsuiginartunik
ilanngussinissaq anguniarpaa.
Innuttaasut
ikittunnguit amerlassusissaannut naatsorsuutit annertuumik
nalorninartoqartarneri nalinginnaasuuvoq. Pingaartumik allaffissornikkut nunap
agguataarneqarnera malillugu kommunikkaartumik, distriktini inoqarfinnilu
naatsorsuutit inernerini.
Pilersaarusiornissamut
atatillugu inoqarfinni innuttaasut amerlassusissaannut naatsorsuutinik
ujartuisoqartarnera Naatsorsueqqissaartarfiup maluginiarpaa. Taamatut
atorfissaqartitsineq naatsorsuutinik matumani saqqummiunneqartunik
matussuserneqarsinnaanngilaq, inoqarfinnilu mikisuni inuiaqatigiit qanoq
inissisimanerannut naatsorsueriaatsip nalinginnaasup atorneqarsinnaanera
qularnartuuvoq.
Naatsorsuutit
inerneri sumiiffimmi pilersaarusiornermut atorneqassatillugit
innersuussutigineqarpoq naatsorsuutit sumiiffimmi pissutsinut, naatsorsuutini
ersersinneqanngitsunut nalerisarneqarnissaat. Assersuutigalugu inissianik
sanaartornermut, inuussutissarsiornermi periarfissanut, assartuinermi suliniutinut
imaluunniit pissutsinut allanut, siunissami meeqqiortarnermi,
toqusoqartarnerani, nuuttarnerni nunasisarnernilu (Kalaallit Nunaannut
Kalaallit Nunaanniillu avammut nuuttarnerni) naatsorsuutini matumani
pineqartuni ersersinneqareersimanngitsunut.